Cisbitaallada Minnesota ayaa samaynaya isbedelo waawayn iyagoo ku dadaalaya inay bixiyaan daryeel ku habboon dhaqanka. Waxay garwaaqsadeen muhiimada ay leedahay waxyaabo yar oo raad fiican ku reeba yaraynta cunsuriyada. Isbitaalada gobolka oo dhan ayaa bilaabay dadaalo ay ku bixinayaan waxyaabo lagu daryeelo timaha iyo maqaarka oo ku habboon baahida bukaannada timaha jilicsan, oo ay ku jiraan kuwa xijaabka xidha.
Mid ka mid ah bukaanada, Amanda Robinson, oo lagu dabiibo isbitaalka Hennepin Health Care Center (HCMC) oo la nool xanuun joogto ah ayaa aad ugu faraxday markii mid ka mid ah kalkaaliyaasha isbitaalka ay siisay agabka timaha. Waxay tiri, “Nolosheyda inteeda badan waxaan aadi jiray isbitaalkan, weligeyna ma arkin waxa hada lii siiyay, waxay muujineysaa in qof uu hadlayo, qofna laga yaabo inuu dhageysto.”
Waxqabadyadani waxay ka tarjumayaan isbeddel ballaadhan oo lagu sameeyay hanaanka daryeelka caafimaadka gaar ahaan garawsiga muhiimada dhaqanka si loo hormariyo u adeegida bukaanka. Iyadoo isbitaallo badan ay qaateen aqoonsiga kala duwanaanshaha, Sinaanta, iyo ka mid noqoshada si ay wax uga qabtaan arrimaha sida caqabadaha luqadda iyo kala duwanaanta shaqaaleysiinta, qaar ayaa hadda garanaya in dhaqamada yaryar ay sidoo kale yeelan karaan saameyn qoto dheer.
Dr. Nneka Sederstrom, Madaxa Sinaanta Caafimaadka ee Hennepin Healthcare, waxay xooga saaraysaa muhiimada ay leedahay in bukaanada la dareensiiyo amaan iyo niyadsami. “Isbitaaladu waa meelo aan la jeclayn,” ayay xustay. “Ma dareemaysid xaaladaada; waxaad dareemeysaa cabsi, walwal, iyo nugayl. Waxyaabo yar yar ayaa ka dhigaya inaad dareento amaan iyo dhamaystirnaan.
Dhawr isbitaal oo Minnesota ku yaala ayaa sameeyay isbeddeladan iyaga oo ka jawaabaya codsiyada bukaanka iyo dadaallada kalkaaliyaasha. kalkaaliye caafimaad oo ka sahqaysa HCMC ayaa bilawday bixinta alaabta timaha ka dib markii ay aragtay baahida loo qabo. Sidoo kale, koox ka tirsan HCMC waxay bilaabeen inay hadiyado siiyaan hooyooyinka dadka laga toirada badanyahay ee ku umula isbitaalka, iyagoo la kaashanaya ganacsiyada maxaliga ah si ay u bixiyaan alaab dhaqan ahaan ku habboon.
Isbitaalada kale ee Minnesota ayaa iyaguna sidaas oo kale sameeyay. Allina iyo Mayo Clinic, tusaale ahaan, waxay hirgeliyeen isbeddello la mid ah iyaga oo ka jawaabaya aqoonsiga baahida bukaanka. Dadaalka Mayo Clinic wuxuu bilaabmay markii kalkaaliye caafimaad ay ogaatay in bukaannada aysan haysan alaab ku habboon. Carruurta Minnesota ayaa ka jawaabtay ka dib markii qoys ay muujiyeen walaac ku saabsan daryeelka timaha ilmahooda.
Jawaab-celinta bukaannada ayaa ahayd mid aad u wanaagsan. Heidi Shafland, oo ah kalkaaliye caafimaad qaybta daryeelka degdegga ah ee wadnaha carruurta, ayaa ka sheekeysay qoys isku dayeen in ay lacag siiyaan sababtoo ah waxay rumaysan waayeen in cisbitaalku si bilaash ah u bixiyay alaab ku habboon.
Saamaynta isbeddelladani waxay dhaafsiisan tahay qanacsanaanta bukaanka. HCMC waxay aragtay kor u kac weyn oo ku yimid qanacsanaanta bukaanada qaybta dhalmada wax yar ka dib markii ay alaabtan siisay hooyooyinka cusub. Isbeddelkan ayaa muujinaya sida isbeddellada yaryar ay u horseedi karaan horumar la taaban karo ee dareenka bukaanka iyo sinnaanta caafimaadka.
Alaabooyinka ay bixiyaan cisbitaaladan waxaa ka mid ah waxyaabo kala duwan oo dhaqan ahaan ku haboon, sida koofiyada hurdada ee satin, burushka timaha, shanlooyinka ilkaha balaadhan, shaambo iyo nafaqada timaha. Dadaallada isbitaalladan Minnesota waxay muujinayaan isbeddel ballaaran oo xagga daryeelka caafimaadka ah, maadaama ay isbitaaladu si isa soo taraysa u aqoonsanayaan muhiimadda ay leedahay daryeel ku haboon dhaqanka si loo bixiyo adeega ugu wanaagsan ee suurtogalka u ah dhammaan bukaannada.
Warbixintani waxaa soo tebisay oo xaqiijisay Sahan Journal.
Add Comment